Ысык-Көл, Нарында 16 млн сомдук мыйзам бузуу аныкталды
Транспорттук прокуратура Жер үстүндөгү жана суу транспорт департаментинин Ысык-Көл жана Нарын башкармалыктарында текшерүү жүргүздү. Бул тууралуу Башкы прокуратура билдирди.
Маалымдалгандай, текшерүүдө 2025-2026-жылдары чет элдик жүк ташуучу унааларга жол эрежесин бузганы үчүн айып пулдар мыйзамды одоно бузуу менен салынганы аныкталган.
Жооптуу кызматкерлердин мыйзамсыз аракеттеринен мамлекетке 16 млн 29 миң сом зыян келтирилген.
Факты боюнча Кылмыш-жаза кодексинин 337-беренеси (кызмат абалын кыянаттык менен пайдалануу) менен эки кылмыш иши козголуп, тергөө жүрүүдө.
