Бишкекте Түрк мамлекеттер уюмунун саламаттык сактоо министрлеринин 6-жыйыны өттү
Бишкекте ТМУнун саламаттык сактоо министрлеринин 6-жыйыны болду. Бул тууралуу Саламаттык сактоо министрлигинен билдиришти.
Маалым болгондой, ага Азербайжан, Казакстан, Түркия, Өзбекстан жана Кыргызстандын саламаттык сактоо жетекчилери, ошондой эле ТМУнун Башкы катчысы Кубанычбек Омуралиев катышты.
Жыйынга Кыргызстандын саламаттык сактоо министри Дамир Осмонов модераторлук кылды.
Жыйында дары-дармектин жеткиликтүүлүгү жана коопсуздугу, кадрдык потенциалды өнүктүрүү, санариптик технологиялар жана жасалма интеллектти медицинага киргизүү талкууланды.
Министр Дамир Осмонов кызматташтык маалымат алмашуу менен чектелбей, биргелешкен долбоорлорго жана практикалык механизмдерге өтүшү керектигин белгиледи.
Кыргыз тарап кадрларды даярдоо, алмашуу, санариптештирүү, чек ара аралык телемедицинаны өнүктүрүү жана бейтаптарды башка өлкөгө дарыланууга жөнөтүү механизмдерин сунуштады. Ошондой эле 2027-жылы электрондук жолдомолор боюнча пилоттук долбоорду ишке киргизүү сунушталды.
Жыйынтыкта Биргелешкен декларация кабыл алынып, 2026-2027-жылдарга Иш-аракеттер планы бекитилди. Анда дары-дармекти биргелешип сатып алуу, TurkEMT демилгеси, Түрк фармакопеясы, кадр алмашуу жана жасалма интеллектти жоопкерчиликтүү колдонуу каралган.
Кийинки 7-жыйын Түркияда өтө турган болду.
