Садыр Жапаров менен Пакистандын президенти сүйлөшүүлөрдү өткөрдү
Президент Садыр Жапаров 7-июлда, Пакистан Ислам Республикасынын Президенти Асиф Али Зардари менен сүйлөшүүлөрдү өткөрдү. Бул тууралуу президенттин расмий баракчасына жарыяланды.
Маалыматка ылайык, жолугушуунун жүрүшүндө лидерлер эки жактуу жана көп тараптуу кызматташтыктын кеңири багыттары боюнча кенен пикир алышты.
Садыр Жапаров жогорку даражалуу конок менен саламдашып, өткөн жылдын декабрь айында Исламабад шаарына болгон мамлекеттик сапарынын алкагында өткөн сүйлөшүүлөрдү эске салды.
“Бүгүнкү жолугушуубуз кызматташтыгыбызга жаңы мазмун берип, саясий диалогду бекемдөөгө, соода-экономикалык, транспорттук-логистикалык жана маданий-гуманитардык байланыштарды сапаттуу деңгээлге чыгарууга жакшы мүмкүнчүлүк берет деп ишенем”, - деди Садыр Жапаров.
Бул контекстте ал Эки өлкөнүн бизнес коомчулугунун ортосунда түз байланыштарды кеңейтүү үчүн бизнес-форумдарды, көргөзмөлөрдү жана B2B жолугушууларды байма-бай өткөрүп туруунун маанилүүлүгүн белгиледи. Ошондой эле Кыргызстан адал-индустрия, айыл чарба продукциясын кайра иштетүү, логистика, туризм, энергетика жана өнөр жай тармактарындагы долбоорлорду Пакистан менен биргеликте илгерилетүүгө даярдыгын айтты.
Өз кезегинде Асиф Али Зардари соода-экономикалык, инвестициялык жана гуманитардык тармактарда кызматташууну өнүктүрүү үчүн олуттуу мүмкүнчүлүктөр бар экенин белгилеп, эки тараптуу кызматташтыкты мындан ары кеңейтүүгө кызыкдарлыгын билдирди.
Асиф Али Зардари Кыргызстан менен тыгыз кызматташууга даяр экенин белгилеп, эки өлкөнүн ортосундагы мамилелер жалпы тарыхый жана маданий байланыштардын бекем пайдубалына негизделгенин айтты.
Бул ниеттерди иш жүзүндө бекемдөө максатында тараптар сүйлөшүүлөрдүн жыйынтыгын Биргелешкен билдирүүгө кол коюу менен бекемдешти. Аталган документ стратегиялык өнөктөштүктү түзүүгө өзөк болуп, соода-экономикалык жана инвестициялык кызматташтыкты тереңдетүүнүн негизги багыттарын аныктады.
