Кыргызстанда финансылык сабаттуулукту жогорулатуу боюнча жаңы программа сунушталууда
Кыргызстанда калктын финансылык сабаттуулугун жогорулатуу жана финансылык маданиятын калыптандыруу боюнча 2027–2031-жылдарга жаңы программа кабыл алуу сунушталууда. Министрлер Кабинетинин тиешелүү токтом долбоору коомдук талкууга чыгарылды.
Документтин негизги максаты — жарандардын финансылык билимдерин жана көндүмдөрүн жакшыртуу, жоопкерчиликтүү финансылык жүрүм-турумду калыптандыруу, санариптик финансылык коопсуздукту күчөтүү жана негиздүү финансылык чечимдерди кабыл алуу мүмкүнчүлүгүн кеңейтүү. Программаны ишке ашырууда беш негизги багыт каралган:
- финансылык билим берүү системасын өнүктүрүү;
- калктын ар кандай категорияларынын муктаждыктарын эске алуу менен финансылык сабаттуулукту жогорулатуу;
- санариптик финансылык сабаттуулукту өнүктүрүү жана финансылык коопсуздукту камсыз кылуу;
- финансылык өнүмдөрдү жана кызматтарды жоопкерчиликтүү пайдалануу жана керектөөчүлөрдүн укуктарын коргоо;
- финансылык сабаттуулуктун туруктуу институционалдык системасын жана инфраструктурасын өнүктүрүү.
2025-жылы Экономикалык кызматташтык жана өнүктүрүү уюмунун эл аралык методологиясына ылайык жүргүзүлгөн изилдөөнүн жыйынтыгында, Кыргызстанда финансылык сабаттуулуктун жалпы индекси - 59% түзгөн.
Анын ичинде финансылык билимдин деңгээли 56%, финансылык жүрүм-турум — 69%, финансылык мамиле — 42%, ал эми финансылык бакубаттуулук 44% болгон.
Изилдөөгө ылайык, калктын болжол менен 59%ы жогорку деңгээлдеги финансылык стресске дуушар болууда. Жарандардын 34%ы гана финансылык билимдин минималдуу чегине жетет. Ал эми узак мөөнөттүү финансылык көз карашка ээ болгондордун үлүшү 7%ды түзөт.
Программаны ишке ашырууга мамлекеттик органдар, Улуттук банк, билим берүү уюмдары, финансы рыногунун катышуучулары, жергиликтүү өз алдынча башкаруу органдары жана башка кызыкдар тараптар тартылат.
Документ кабыл алынса, аны ишке ашыруу тиешелүү мамлекеттик органдардын жана уюмдардын бюджеттеринде каралган каражаттардын, ошондой эле мыйзамда тыюу салынбаган башка булактардын эсебинен жүргүзүлөт.
