Кыргызстан менен Кытай 11 ири долбоорду ишке ашырууну талкуулады
Суу ресурстары, айыл чарба жана кайра иштетүү өнөр жайы министри Эрлист Акунбеков Кытайдын Эл аралык өнүктүрүү жана кызматташтык агенттигинин төрагасы Чэнь Сяодун менен жолукту. Бул тууралуу өкмөттүн басма сөз кызматы билдирди.
Маалыматка ылайык, жолгушууда эки өлкөнүн соода-экономикалык кызматташтыгын өнүктүрүү жана биргелешкен долбоорлорду ишке ашыруу маселелери талкууланды.
Тараптар акыркы жылдары эки өлкөнүн кызматташтыгы күчөп, бир катар ири долбоорлор ишке ашырылып жатканын белгилешти. Анын ичинде өткөн жылы Кыргызстан менен Кытайдын ортосундагы өз ара соода жүгүртүүнүн көлөмү 27 млрд долларга жеткени айтылды.
Ошондой эле "Кытай–Кыргызстан–Өзбекстан" темир жолун куруу долбоору, "Бедел" өткөрмө пунктунун ачылышы жана "Бедел–Барскоон" автожолунун курулушу боюнча иштер талкууланды.
Мындан тышкары айыл чарба, саламаттыкты сактоо, транспорттук жана бажы инфратүзүмү, атайын техника менен камсыздоо жана айлана-чөйрөнү коргоо багытында 11 ири долбоорду ишке ашыруу мерчемделип жатканы белгиленди.
Жыйынтыгында тараптар бул маселелерди жакында өтө турган өкмөттөр аралык комиссиянын жыйынында кароону жана эки тараптуу документтерди даярдоону макулдашты.
