Нью-Йоркто Кыргызстанга жаңы инвестицияларды тартуу маселеси талкууланды
16-июлда Нью-Йорк шаарында Экономика жана коммерция министри Бакыт Сыдыков Oppenheimer Holdings Inc. компаниясынын жетекчилиги менен жолугушуу өткөрдү.
Экономика министрлигинин басма сөз кызматы билдиргендей, тараптар Кыргызстандын социалдык-экономикалык өнүгүүсүнүн учурдагы абалын жана инвестициялык кызматташууну кеңейтүүнүн келечегин талкуулашты.
Министр өлкөнүн негизги макроэкономикалык көрсөткүчтөрү тууралуу маалымат берип, энергетика, туризм жана транспорттук-логистикалык инфраструктура тармактарында ишке ашырылып жаткан ири улуттук долбоорлорду тааныштырды.
Жолугушууда санкциялык талаптарды сактоо маселелери, Кыргызстандын эгемендүү кредиттик рейтингин "S&P Global Ratings", "Moody's" жана "Fitch Ratings" эл аралык рейтингдик агенттиктери тарабынан жогорулатуу боюнча жүргүзүлүп жаткан иштер көңүл борборунда болду.
Бакыт Сыдыков ошондой эле "Элдик Банк" ААК тарабынан еврооблигациялардын ийгиликтүү жайгаштырылышын белгилеп, бул жетишкендик инвесторлордун ишениминин өсүп жатканын жана экономикалык саясаттын натыйжалуулугун тастыктаган маанилүү көрсөткүч экенин билдирди.
Жолугушуунун жыйынтыгында тараптар кыргыз компанияларын эл аралык капиталга чыгаруу, инвестицияларды тартуу механизмдерин өркүндөтүү жана өз ара кызыкчылык жараткан биргелешкен демилгелерди ишке ашыруу боюнча кызматташууну тереңдетүүгө кызыкдар экендиктерин ырасташты.
