Шавкат Мирзиёев: Товар жүгүртүүдө 2 млрд долларлык көрсөткүч акыркы чек эмес
Президент Садыр Жапаров менен Өзбекстандын президенти Шавкат Мирзиёев 30-июлда, Ысык-Көл облусунун Чолпон-Ата шаарында бетме-бет жана кеңейтилген курамда сүйлөшүүлөрдү өткөрүштү. Бул тууралуу президенттин расмий баракчасына жарыяланды.
Маалмытка караганда, бетме-бет форматтагы сүйлөшүүлөрдүн жүрүшүндө Садыр Жапаров Шавкат Мирзиёевди жылуу тосуп алып, анын мамлекеттик сапары кыргыз-өзбек мамилелерине жаңы дем берет деген ишенимин билдирди.
Лидерлер бүгүн эки жактуу кызматташтыктын күн тартибиндеги негизги маселелер талкууланып, жетишилген макулдашуулар тиешелүү документтер менен бекемделерин белгилешти.
Мамлекет башчысы Камбар-Ата-1 ГЭСинин жана “Кытай – Кыргызстан – Өзбекстан” темир жолунун курулушу сыяктуу биргелешкен стратегиялык долбоорлордун маанисин белгиледи. Ошондой эле мамлекеттик сапардын алдында өткөн өкмөттөр аралык комиссиянын жыйынынын, бизнес-форумдун, ишкерлер кеңешинин жыйынынын, Кыргызстандагы Өзбекстандын маданият күндөрүнүн жана эки өлкөнүн жогорку окуу жайларынын ректорлор форумунун жыйынтыктарына токтолду.
Шавкат Мирзиёев тараптар товар жүгүртүүнү бир нече эсеге көбөйтүү боюнча макулдашканын айтып, эки миллиард долларлык көрсөткүч акыркы чек эмес экенин баса белгиледи.
Шавкат Мирзиёев стратегиялык долбоорлорго да өзгөчө көңүл буруп, “Кытай – Кыргызстан – Өзбекстан” темир жолунун курулушун аймактагы геосаясий кырдаалды өзгөртө турган “кылымдын курулушу” деп атады. Ошондой эле Камбар-Ата-1 ГЭСинин курулушунун маанисине токтолду.
Сөзүнүн соңунда президент Шавкат Мирзиёев бүгүнкү сүйлөшүүлөрдүн жыйынтыгы өзбек-кыргыз достугун, жакын коңшулукту жана союздаштыкты мындан ары да бекемдөөгө кызмат кыларына ишеним билдирди.
