Балдардын медициналык маалымкаттарын эми электрондук түрдө берүүгө болот
Балдар үчүн 095/у жана 026/у формасындагы медициналык маалымкаттар этап-этабы менен электрондук форматка өткөрүлүүдө. Эми ата-энелер жана мыйзамдуу өкүлдөр аларды электрондук түрдө мектепке чейинки, жалпы билим берүү жана баштапкы кесиптик билим берүү уюмдарына бере алышат.
Саламаттыкты сактоо министрлигинин билдирүүсүнө караганда, маалымкаттар "Түндүк" мобилдик тиркемесинде жеткиликтүү. 2026-жылдын 24-августунан тартып бул маалымкат электрондук түрдө гана берилет. Ошондуктан билим берүү мекемелери анын кагаз түрүндөгү нускасын талап кылбашы керек.
095/у маалымкаты баланын ден соолугуна байланыштуу сабактан бошотулганын тастыктайт. Ал эми 026/у формасы баланын ден соолугунун абалы жана профилактикалык медициналык кароолорунун жыйынтыктары тууралуу маалыматтарды камтыйт.
Ал 2027-жылдын 1-январына чейин электрондук да, кагаз түрүндө да бериле берет. Эгер 026/у маалымкаты электрондук түрдө бар болсо, анын кагаз көчүрмөсүн кайра талап кылуунун зарылдыгы жок.
