Астанада "Борбор Азия – Италия" бизнес форуму өттү
18-сентябрда Астана шаарында «Борбор Азия + Италия» бизнес-платформасынын форуму өтүп, анын алкагында B5+ITALY платформасы расмий ишке кирди. Форумга Италия, Кыргызстан, Түркмөнстан жана Өзбекстандын тармактык министрликтеринин өкүлдөрү катышты. Кыргызстандан ишчарага Экономика жана коммерция министринин орун басары Султан Ахматов катышкан.
Иш-чарада Борбор Азия өлкөлөрү менен Италиянын ортосундагы соода-экономикалык жана инвестициялык кызматташтыкты кеңейтүү, биргелешкен өндүрүштөрдү түзүү, жаңы логистикалык багыттарды өнүктүрүү жана бизнес өкүлдөрүнүн түз байланыштарын күчөтүү маселелери талкууланды.
Форумда кызматташтыктын бир нече конкреттүү багыты белгиленди. Алардын арасында чийки зат эмес продукциянын экспортун көбөйтүү, биргелешкен ишканаларды ишке киргизүү, аймактык соода-логистикалык хабдарды өнүктүрүү жана түз транспорттук каттамдарды кеңейтүү бар.
Казакстандын соода жана интеграция министрлигинин билдирүүсүнө караганда, иш-чарада Борбор Азия өлкөлөрү менен Италиянын ортосундагы соода-экономикалык жана инвестициялык кызматташтыкты кеңейтүү, биргелешкен долбоорлорду ишке ашыруу жана ишкерлер ортосундагы байланыштарды чыңдоо маселелери талкууланды.
Казакстандын соода жана интеграция министри Арман Шаккалиевдин айтымында, B5+ITALY платформасы италиялык бизнестин Борбор Азия өлкөлөрү менен түз кызматташуусун камсыз кылган практикалык механизмге айланышы керек. Кызматташтык соода жана инвестиция менен гана чектелбестен, өнөр жай кооперациясын, транспортту, логистиканы жана жаңы технологияларды да камтыйт.
Тараптар Казакстан менен Италиянын ортосунда түз авиакаттамдарды ачуу маселесин да талкуулады. Мындай байланыштар бизнес жана инвестициялык кызматташтык менен катар туристтик байланыштарды өнүктүрүүгө шарт түзөрү белгиленди.
Айыл чарба тармагында дан жана май өсүмдүктөрү менен катар өсүмдүк майларын терең кайра иштетүү, белоктуу азыктарды, унду жана кошумча наркы жогору башка продукцияларды экспорттоо мүмкүнчүлүктөрү каралды.
Форумдун жыйынтыгында тараптар өз ара пайдалуу кызматташтыкты мындан ары бекемдөөгө, ишкердик байланыштарды кеңейтүүгө жана биргелешкен соода-инвестициялык долбоорлорду ишке ашырууга кызыкдар экенин билдиришти.
