Садыр Жапаров менен Ильхам Алиев сүйлөшүүлөрдү өткөрүштү
31-июлда, Ысык-Көл облусунун Чолпон-Ата шаарында Президент Садыр Жапаров менен Азербайжандын президенти Ильхам Алиевдин сүйлөшүүлөрү болуп өттү. Бул тууралуу президенттин расмий баракчасына жарыяланды.
Маалыматка караганда, Садыр Жапаров бетме-бет сүйлөшүү учурунда Азербайжандын президентине Кыргызстанга мамлекеттик сапар менен келүү чакыруусун кабыл алгандыгы үчүн ыраазычылык билдирип, бул сапар кыргыз-азербайжан кызматташтыгын мындан ары өнүктүрүүгө жаңы дем берерине ишеним артты.
Садыр Жапаров экономика, инвестиция, транспорт, энергетика, билим берүү жана башка багыттар боюнча өз ара кызматташтыкты кеңейтүү үчүн олуттуу мүмкүнчүлүктөр бар экенин белгиледи.
Өз кезегинде Азербайжандын Президенти Ильхам Алиев Кыргызстандын социалдык-экономикалык өнүгүүсүндөгү, экономикалык потенциалын чыңдоодогу жана өлкөнүн эл аралык аброюн жогорулатуудагы олуттуу ийгиликтерине токтолду.
Азербайжандын президенти биргелешкен долбоорлорго, анын ичинде Карабахтын Агдам районунда белек катары курулган “Айкөл Манас” атындагы орто мектепке, Кыргыз-Азербайжан өнүктүрүү фондунун ишмердүүлүгүнө, маданий алмашууга, ошондой эле Азербайжандын Ысык-Көлдөгү туризмди өнүктүрүүгө кошкон салымына жогору баа берди.
Мамлекет башчылары жетишилген макулдашуулар Кыргызстан менен Азербайжандын ортосундагы боордоштук жана союздаштык алакаларды эки өлкөнүн элдеринин жыргалчылыгы үчүн мындан ары дагы чыңдоого өбөлгө түзөрүнө ишеним билдиришти.
