Картонго жан киргизип - Чубак ажы сыяктуу инсандардын элесин чагылдырган Баткендик жигиттин таланты жана кыялдары
Сүрөт тарткан адамдар көп. Бирок сүрөттү өзгөчө ыкма менен жаратып, аны жөнөкөй хоббиден чыгармачылыктын өз алдынча багытына айлантууга аракет кылгандар саналуу эле. Алардын бири Баткендин Лейлек районундагы Жаштык айылында туулуп-өскөн Нурсултан Халбеков төрт жыл мурда өз алдынча жаңы ыкмада портреттерди жасай баштаган.
Азыр Нурсултан Халбековдун ишмердүүлүгү интернет айдыңында “баракелде” – деп суктанууларды айтып, буйрутмаларды берүүгө негиз болуп, кардарларынын алкышына арзып жаткан кез. “Ишкер медиа” дагы жаш таланттын ишмердүүлүгүнө кызыгып - Нурсултан менен анын чыгармачылыгы, алгачкы кадамдары жана келечек пландары тууралуу маектешти.
Алгач өзүң тууралуу айтып берсең. Учурда эмне менен алексиң?
Мен Баткен облусунун Лейлек районундагы Жаштык айылында туулуп, ошол жерде чоңойгом. Үй-бүлөдө эң кичүү баламын. Бир байкем, бир эжем жана ата-энем бар. Үйлөнө элекмин. 28 жашка чыктым.
Азыркы учурда Москва шаарында курулуш тармагында иштеп жатам. Кыргызстанга жылына бир же эки жолу барып турам.
Нурсултандын жеке куржунунан
Портрет жасоо өнөрүнө качан кызыгып баштадың эле?
Мындан төрт жыл мурда жасап баштагам. Мектепте окуп жүргөндө кол эмгек жана сүрөт сабагына кызыгып, мектеп аркылуу өткөрүлгөн сынактарга катышып турчумун. Башында сүрөт тартып, аларды социалдык тармактарга чыгаргым келген. Бирок сүрөт тарткан адамдар абдан көп болгондуктан, эч кимде жок, өзгөчө бир нерсе жасагым келчү.
Бул ыкманы кимден үйрөндүң, устатың ким?
Өзүм эле үйрөнгөм. Билгеним боюнча, эч кимге окшобогон иш жасадым. Эң алгачкы сүрөтүмдү 2022-жылы YouTubeга жүктөгөм. Биринчи тарткан портретим — кумир туткан футболчум Криштиану Роналду болгон.
Чоң атам жыгач уста болгон, керебеттер менен сандыктарды мыкты жасаган киши болчу. Мүмкүн, жөндөмүм ошол чоң атамдан калган болсо керек деп, ойлойм.
Нурсултандын жеке куржунунан
Бир портретти жасоого канча убакыт кетет? Буйрутма аласыңбы?
Негизинен бир портретке 8–12 саат кетет. Бирок жумушума байланыштуу күнүнө 2–3 саат гана убакыт бөлө алам. Ошондуктан азыр бир портретти бир нече күндө бүтүрүп жатам.
Бул менин толук кандуу ишмердүүлүгүм деп айта албайм. Көп адамдар “заказ аласыңбы?” деп сурашат. Бирок физикалык жактан баарын жасап бүткөнгө үлгүрбөйм. Негизги жумушум башка. Ошондуктан кээде гана заказ кабыл алып калам.
Бир портретти канча сомго жасайсың?
Баасын көңүлдөн чыкканын бергиле, деп айтам. Ким кандай бааласа, ошончо беришет. Кээде бир сүрөткө 20 миң сом берген учур да болгон.
Жасаган иштердин ичинен өзгөчө эсте калганы кайсы?
Эң эсте калган портрет - устазыбыз Чубак Ажы Жалиловдун портрети. Аны жарыялагандан кийин көп адамдар жакшы сөздөрүн жазып, комментарийлерге оң пикирлерин калтырышты. Ошол кишинин портретин көптөр сурашты. Андан тышкары, дал ошол портрет мага - эң көп катталуучу алып келди.
Мага катталуучулар абдан жакшы, жылуу сөздөрдү жазышат. Аларды окуп, кайрадан иштөөгө шыктанам. Ошондуктан кайра-кайра жасагым келет.
Сага көбүнчө кимдер кайрылышат?
Көбүнчө Instagram аркылуу кайрылышат. Блогерлер жана ырчылар да сурашат.
Азыр жаңы, өзгөчө бир искусствонун түрүн ойлонуп жатам. Жасай турган ишим эч жерде жок, эң алгачкысы болот деп ишенем. Аны менен да жакында таанышасыздар.
Келечекте бул өнөрдү кандай деңгээлге жеткиргиңиз келет?
Келечекте мен - музей ачууну ойлоп жатам. Бирок картондон эмес, темир жана алюминийден чоң портреттерди жасап чыгуу максатым бар.
Бул чыгармачылыктан сырткары кандай кыялдарың бар?
Келечекте өзүмдү кино тасмада, каарман катары көргүм келет. Бул - менин кыялым. Сүрөттөн башка дагы кызыгууларымдын бири - кино. Негизи сценарий жазам, азыр китеп жазып жатам. Келечекте аны киного айландырууну да максат кылып жатам. Кинодон сунуш болсо экен, деп күтүп жүрөм.
