Эксперттер Борбор Азия өлкөлөрүндөгү атом энергетикасынын келечегин талкуулашты

24-сентябрда Бишкекте атом энергетикасы жана өнөр жайынын ардагерлеринин эл аралык союзунун колдоосу менен КРнын Энергетикасынын ардагерлер кеңеши” коомдук бирикмеси тарабынан “Кыргыз Республикасында атом энергетикасын жана технологияларын өнүктүрүүнүн келечеги” аталышындагы эл аралык семинар болуп өттү.  

Иш-чарага Кыргызстандын атомдук жана энергетика тармактарынын ардагерлери, “Росатом” мамкорпорациясынын коомдук кеңешинин мүчөлөрү, коомдук уюмдардын жана жаштар бирикмелеринин өкүлдөрү катышты. Өзүнүн ыкмаларын жана тажрыйбасын Кыргызстан, Россия, Казакстан, Тажикстан, Өзбекстан, Беларусь, Болгария жана Кытайдан келген адистер сунушташты.

Катышуучулар атом энергетикасын өнүктүрүүнүн келечегин жана анын көмүртек бөлүп чыгарууну азайткан экономикага өтүүдөгү ролун талкуулашты. Өзүнчө баяндамалар заманбап технологиялар жана тынчтык атомунун энергиясынын мүмкүнчүлүктөрүнө: атом энергетикасында жасалма интеллект жана санарип эксперттик системаларды колдонуу, аз кубаттуулуктагы атом станцияларынын потенциалы жана ядролук энергияны тынчтык максатта пайдаланууга көзөмөл жүргүзүүгө көңүл бурулду.

“Бүгүнкү күндө биз адистердин күч-аракетин бириктирип, ядролук технологияларды кошо алганда, энергетиканы өнүктүрүүнүн келечегин комплекстүү талдап, кадрларды даярдоонун жогорку деңгээлине өзгөчө көңүл бурушубуз керек. Бишкектеги семинар Кыргызстанда жана жалпы Борбор Азия аймагында энергетикалык коопсуздуктун кызыкчылыгында кесиптик диалог жана кызматташтыкты чыңдоо үчүн аянтча болот, деп ишенебиз”, — деп белгиледи атом энергетикасы жана өнөр жайы ардагерлеринин эл аралык союзунун төрагасы Павел Ипатов.

Өз сөзүндө КРнын энергетика министринин орун басары Бекнур Маратбеков - Кыргызстан үчүн энергетиканы өнүктүрүү, биринчи кезекте ишенимдүү энергия менен узак мөөнөттүү энергетикалык коопсуздуктун маселеси экенин билдирди.

“Атомдук технологияны колдонуу мүмкүнчүлүгүн карап жатканда, биз коопсуздукту, улуттук адистерди окутууну жана зарыл болгон инфраструктураны өнүктүрүүнү артыкчылыктуу деп көңул бурушубуз керек. Бул жерде эл аралык уюмдар жана бул тармакта тиешелүү тажрыйбага ээ өлкөлөр менен тажрыйба алмашуу өзгөчө маанилүү: ал республиканын кызыкчылыктарын эске алуу менен негиздүү чечимдерди иштеп чыгууга жардам берет”, — деди Бекнур Маратбеков.

Семинардын программасына ошондой эле уран мурасы менен байланышкан маселелер да кирди. Эксперттер уран калдыктарын сактоочу жайларды рекультивациялоо боюнча дүйнөлүк тажрыйбаны карап чыгышты. «Росатом» мамлекеттик корпорациясынын Кыргызстандагы өкүлчүлүгүнүн башкы директору Дмитрий Константинов корпорациянын Кыргызстанда кайра жаралуучу энергетика, жогорку технологиялык медицина жана экологиялык коопсуздук жаатындагы долбоорлорду ишке ашыруу боюнча ишмердүүлүгүнүн негизги багыттары тууралуу айтып берди.