Кыргыз-корей алакасы: "Менин айылым" долбооруна дагы 670 миң доллар бөлүнөт
Мамлекеттик кызмат жана жергиликтүү өз алдынча башкаруу иштери боюнча мамлекеттик агенттикте "Менин айылым" долбоорун колдоону улантуу боюнча өз ара түшүнүшүү меморандумуна кол коюу аземи болуп өттү.
Аталган кызматтан билдиришкендей, иш-чарага Мамлекеттик агенттиктин директору Элчибек Жантаев, Кореянын Кыргызстандагы элчиси Ким Квангже, ошондой эле KOICAнын Кыргызстандагы өкүлчүлүгүнүн жетекчиси Лим Со Ён катышты.
Салтанатта сөз сүйлөгөн Элчибек Жантаев KOICA менен көп жылдык өнөктөштүктүн маанисине токтолуп, уюм Кыргызстанда адам ресурстарын өнүктүрүү, туруктуу өнүгүүнү камсыз кылуу жана мамлекеттик башкарууну чыңдоо багытындагы ишенимдүү өнөктөш экенин белгиледи.
Кол коюлган меморандум 2019–2023-жылдары Чүй, Ош жана Баткен облустарынын 30 айылында ишке ашырылган "Менин айылым" долбоорунун алкагында жетишилген жыйынтыктарды бекемдөөгө жана айылдык жамааттарды мындан ары колдоого багытталган.
Ким Квангже айылдардын туруктуу өнүгүүсү тургундардын катышуусу менен гана мүмкүн экенин белгилеп, меморандум жетишилген натыйжаларды бекемдеп, ийгиликтүү демилгелерди улантууга өбөлгө түзөрүн билдирди.
Өз кезегинде Лим Со Ён долбоордон кийинки колдоо кирешени көбөйтүүгө багытталган демилгелерди өнүктүрүүгө, мурда түзүлгөн объектилерди калыбына келтирүүгө жана туруктуу пайдаланууга, ошондой эле жергиликтүү лидерлердин дараметин жогорулатууга багытталарын айтты.
Долбоордун кийинки баскычынын жалпы бюджети 670 миң долларды түзүп, 2026–2027-жылдары Ош жана Баткен облустарында ишке ашырылат.
Тараптар меморандумга кол коюу кыргыз-корей кызматташтыгын мындан ары чыңдоодо жана өлкөнүн айыл аймактарынын туруктуу өнүгүүсүн камсыз кылууда маанилүү кадам болорун белгилешти.
