Кыргызстан климаттык долбоорлор боюнча эл аралык өнөктөштүктү бекемдейт
Министрлер Кабинетине караштуу Климаттык каржылоо борбору Азиянын токой кызматташтыгы уюмунун (AFoCO) өкүлдөрү менен жолугушуп, учурдагы долбоорлордун жүрүшүн жана келечектеги биргелешкен демилгелерди талкуулады.
Борбордун маалыматына ылайык, жолугушууда Кыргызстанда ишке ашырылып жаткан агротокой чарбачылыгы аркылуу көмүр кычкыл газынын бөлүнүп чыгышынын ордун толтуруу боюнча иштин жыйынтыктары каралды.
Долбоор фермерлер арасында агротокой чарбачылыгын өнүктүрүүгө, жерлерди калыбына келтирүүгө, азык-түлүк коопсуздугун чыңдоого жана жергиликтүү жамааттар үчүн көмүртек каржылоосун тартууга багытталган.
Тараптар ошондой эле AFoCOнун Жашыл климаттык фонд менен кызматташуусун жана тоолуу токойлорду сактоо үчүн эл аралык климаттык каржылоону тартуу маселесин талкуулашты.
Өз кезегинде Климаттык каржылоо борбору Париж келишиминин 6-беренесине ылайык көмүртек рыногун өнүктүрүү жана 2030-жылга чейинки Климаттык инвестициялык программаны ишке ашыруу боюнча жүргүзүлүп жаткан иштер тууралуу маалымат берди.
Ал эми AFoCO уюму 2025–2034-жылдарга карата климат боюнча иш-аракеттердин алкагында Кыргызстан менен кызматташууну улантууга жана токойлорду калыбына келтирүүгө колдоо көрсөтүүгө даяр экенин билдирди.
