Кыргызстан менен Орусия аймактар аралык кызматташууну чыңдоону көздөйт

Мамлекет башчысы Садыр Жапаров Чолпон-Ата шаарында Орусиянын аймактарынын жетекчилерин кабыл алды. Бул тууралуу президенттин админстрациясынан билдиришти.

Жолугушууда тараптар аймактар аралык байланыштарды чыңдоо, соода-экономикалык кызматташтыкты кеңейтүү жана биргелешкен долбоорлорду ишке ашыруу маселелерин талкуулашты.

Президент Садыр Жапаров Кыргызстанда өтүп жаткан Кыргыз-Россия VIII экономикалык форуму жана Кыргыз-Россия XII аймактар аралык конференциясы жаңы демилгелерди иштеп чыгууга жана өз ара пайдалуу өнөктөштүктү өнүктүрүүгө шарт түзөрүн айтты.

Ошондой эле өнөр жай, фармацевтика, айыл чарба продукциясын кайра иштетүү, санариптештирүү жана заманбап технологиялар багыттарында биргелешкен долбоорлорду ишке ашыруунун маанилүүлүгүнө токтолду.

Өлкө башчы Кыргызстандын Жогорку технологиялар паркынын жана "Тамчы" атайын финансылык-инвестициялык аймагынын мүмкүнчүлүктөрү орусиялык өнөктөштөргө сунушталары белгиленди.

Жолугушуунун жүрүшүндө Орусиянын аймак жетекчилери агроөнөр жай комплекси, IT жана туризм тармактарында кызматташууну өнүктүрүүгө кызыкдар экенин билдиришти.