Бишкекте эл аралык эксперттер менен шайлоо боюнча талкуу өтүп жатат
Бишкекте "Шайлоо өткөрүү жаатындагы ЕККУнун эл аралык стандарттары жана милдеттенмелери, шайлоо чөйрөсүндө Демократиялык институттар жана адам укуктары боюнча бюросунун сунуштарын ишке ашыруу" темасында эки күндүк тегерек үстөл өтүп жатат.
БШКнын басма сөз кызматы билдиргендей, иш-чараны Борбордук шайлоо комиссиясынын төрагасынын орун басары Лейла Лурова ачып, өлкөдөгү шайлоо системасын өркүндөтүүгө багытталган мыйзамдык реформалар боюнча маалымат берди.
Анын айтымында, жүргүзүлүп жаткан өзгөртүүлөр шайлоонун ачык-айкындуулугун, натыйжалуулугун камсыз кылууга жана аны эл аралык стандарттарга шайкеш келтирүүгө багытталган.
Лейла Лурова шайлоо мыйзамдарын өнүктүрүү жана Европадагы коопсуздук жана кызматташтык уюмунун сунуштарын ишке ашыруу багытында эл аралык эксперттер менен пикир алмашууга шарт түзгөн иш-чаранын маанилүүлүгүн белгиледи.
Катышуучулар ЕККУнун (Европадагы коопсуздук жана кызматташтык уюму) шайлоого байкоо жүргүзүү ыкмасын, шайлоо ишин жакшыртуу боюнча сунуштарды иштеп чыгуу жана аларды ишке ашыруу жолдорун талкуулап жатышат.
ЕККУнун эксперттери Кыргызстанга мурда берилген сунуштардын аткарылышы боюнча талдоолордун жыйынтыктарын сунуштап, шайлоо иштерин өркүндөтүүгө багытталган эл аралык тажрыйбалар менен бөлүшүүдө.
с
