“Лизун” каймана аты менен белгилүү болгон Элдар Жакыпбековдун жакыны кармалды
4-августта Бишкек шаарынын Биринчи май райондук соту "Лизун" каймана аты менен белгилүү болгон С.У.ну камакка алуу чечимин чыгарды. Бул тууралуу райондук соттун басма сөз кызматы билдирди.
4-августта сот мекемелер аралык тергөө тобунун жетекчиси – Аскер прокуратурасынын тергөө башкармалыгынын башчысынын орун басары тарабынан берилген өтүнүчтү канааттандырып, “Лизун” каймана аты бар адамды 15-августка чейин №1 тергөө абагына камоо чечимин чыгарды. Шектүү коррупция беренеси менен айыпталууда.
Буга чейин социалдык тармактарда спортчулардын, УКМКнын кызматкерлеринин, ишкерлердин, милиция кызматкерлеринин жана башка адамдардын сүрөттөрү камтылган видео тараган. Видео авторлору аларды УКМКнын Бишкек шаары боюнча башкармалыгынын мурдагы жетекчиси Элдар Жакыпбеков менен байланышы бар делген "40 Чоро" тобунун мүчөлөрү катары аташкан. Аталгандардын арасында "Лизун" да болгон.
