Садыр Жапаров ЕАЭБге мүчө мамлекеттердин өкмөт башчылары менен жолугушту
Президент Садыр Жапаров 7-августта, Ысык-Көл облусунун Чолпон-Ата шаарында Евразия өкмөттөр аралык кеңешинин кезектеги жыйынына катышуу үчүн Кыргызстанга келген Евразия экономикалык биримдигине мүчө мамлекеттердин өкмөт башчылары менен жолугушту. Бул тууралуу президенттин расмий баракчасына жарыяланды.
Маалыматка караганда, жолугушууга Министрлер Кабинетинин төрагасы Адылбек Касымалиев, Армения премьер-министри Никол Пашинян, Беларусь Республикасынын премьер-министри Александр Турчин, Казакстандын премьер-министри Олжас Бектенов, Орусиянын өкмөтүнүн төрагасы Михаил Мишустин, ошондой эле Евразия экономикалык биримдигине байкоочу мамлекет катары иш-чараларга катышкан Өзбекстандын премьер-министри Абдулла Арипов жана Евразия экономикалык комиссиясынын коллегиясынын төрагасы Бакытжан Сагинтаев катышты.
Мамлекет башчысы саламдашуу сөзүндө Кыргызстан ЕАЭБди тең укуктуу жана өз ара пайдалуу өнөктөштүктү өнүктүрүү, экономикалык интеграцияны тереңдетүү жана биргелешкен долбоорлорду ишке ашыруу үчүн маанилүү аянтча катары карай турганын белгиледи.
Садыр Жапаров кийинки Евразия экономикалык форуму 2027-жылы Кыргызстан ЕАЭБ органдарына төрагалык кылуусунун алкагында өтөрүн белгиледи. Президент ошондой эле форумга өнөктөш мамлекеттерди жана эл аралык уюмдарды кеңири тартуу аркылуу анын катышуучуларынын чөйрөсүн кеңейтүүнү сунуштады.
Мамлекет башчысы өнөр жай жана агроөнөр жай комплексиндеги биргелешкен кооперациялык долбоорлорду активдештирүүнүн, ошондой эле Биримдикке мүчө бардык мамлекеттер үчүн колдоо жана каржылоо механизмдерине тең укуктуу жеткиликтүүлүктү камсыздоонун зарылдыгына өзгөчө көңүл бурду.
