Эгемендүүлүктүн 35 жылдыгы: майрамдык иш-чараларга даярдык күчөтүлөт
11-августта Министрлер Кабинетинин төрагасы Адылбек Касымалиев Кыргызстандын Эгемендүүлүгүнүн 35 жылдыгына арналган иш-чараларды даярдоо жана өткөрүү боюнча уюштуруу комитетинин кезектеги отурумун өткөрдү.
Өкмөттүн басма сөз кызматы билдиргендей, быйыл Эгемендүүлүк күнүнө арналган негизги майрамдык иш-чаралар Талас өрөөнүндө өтөт.
Жыйында майрамга даярдыктын жүрүшү, башкы программанын мазмуну, концерттик программанын концепциясы жана Талас облусунда ачыла турган объектилердин даярдыгы талкууланды.
Адылбек Касымалиев даярдык иштерин жогорку деңгээлде уюштуруу зарылдыгын белгилеп, бардык курулуш, көрктөндүрүү жана уюштуруу иштерин белгиленген мөөнөттө бүтүрүүнү тапшырды.
Ошондой эле жыйында Талас облусундагы даярдык иштеринин жүрүшү боюнча маалымат берилип, майрамдык иш-чаралардын башкы программасы жана концерттик программанын жалпы концепциясы тааныштырылды.
Жыйынтыгында тиешелүү мамлекеттик органдарга тапшырмалар берилип, жетекчилердин милдеттерди өз убагында жана сапаттуу аткаруусу боюнча жеке жоопкерчилиги эскертилди.
