Кыргызстан PPR ылаңына каршы 1,5 млн доза вакцина алды
Ветеринария, мал чарбасын өнүктүрүү, жайыт жана тоют кызматы БУУнун Азык-түлүк жана айыл чарба уюму (ФАО) менен кызматташтыктын алкагында майда мүйүздүү малдын кыргын ылаңына (PPR) каршы 1,5 миллион доза вакцина алды. Бул тууралуу Айыл Чарба министрлиги билдирди.
Маалымдалгандай, вакцина партиясын ФАОнун Кыргызстандагы өкүлү Олег Гучгельдиев тапшырды.
Вакцина Танзаниядагы Hester Biosciences Africa Limited заводунда өндүрүлгөн. Ал коопсуздук, тазалык жана натыйжалуулук боюнча Бүткүл дүйнөлүк жаныбарлардын саламаттыгын коргоо уюмунун (WOAH) талаптарына жооп берет.
Алынган вакциналар республика боюнча майда мүйүздүү малды пландуу эмдөө өнөктүгүнүн алкагында колдонулат. Эмдөө учурунда Ветеринардык кызматтын лабораториялары тарабынан поствакциналык мониторинг жүргүзүлөт. Бул вакцинанын натыйжалуулугун баалоого жана иммундук жоопту көзөмөлдөөгө мүмкүндүк берет.
Майда мүйүздүү малдын кыргын ылаңы - кой-эчкилер арасында кеңири таралуучу жугуштуу вирустук оору. Ага каршы өз убагында эмдөө жүргүзүү малдын саламаттыгын коргоодо жана өлкөдөгү эпизоотиялык туруктуулукту камсыз кылууда маанилүү роль ойнойт.
