Бишкекте ак илбирсти сактоого арналган Snow Leopard Run марафону өттү
Бүгүн Бишкекте ак илбирсти жана анын табигый жашоо чөйрөсүн сактоого колдоо көрсөтүүгө багытталган Bishkek Snow Leopard Run 2026 эл аралык чуркоо жарышы өттү.
Иш-чарага өлкөнүн ар кайсы аймактарынан келген чуркоочулар, ошондой эле Казакстан, Өзбекстан жана башка өлкөлөрдүн өкүлдөрү катышты.
Катышуучулар 5, 14, 21,1 жана 42,2 чакырым аралыкта күч сынашты. Эң узун аралык 42,2 чакырымды түзүп, толук марафон катары уюштурулду.
Уюштуруучулардын маалыматына ылайык, катышуучулардын старттык төлөмдөрүнүн бир бөлүгү жыл сайын ак илбирсти сактоо жана тоо экосистемаларын коргоо боюнча программаларга багытталат. Жарыштын негизги максаты - спорт аркылуу адамдарды бириктирүү менен бирге ак илбирсти жана анын жашоо чөйрөсүн коргоого коомчулуктун көңүлүн буруу.
Bishkek Snow Leopard Run жарышы 2019-жылдан бери уюштурулуп келет. 2026-жылы иш-чара жетинчи жолу өткөрүлдү. Марафон эл аралык деңгээлдеги чуркоо иш-чараларынын катарына кирип, Turkic Alliance of Long Runs (TAN) сериясынын курамына кошулган.
Быйылкы жарышты уюштуруучулар "Манас" эл аралык аэропортунун аймагында өткөрүүнү чечишкен. Буга шаар көчөлөрүн узак убакытка жабууга байланыштуу транспорттук кырдаал жана коопсуздук талаптары себеп болгон.
Bishkek Snow Leopard Run спорттук мелдеш гана эмес, жаратылышты коргоо демилгесин колдогон иш-чара катары да өткөрүлүп келет. Анын алкагында чуркоочулар өздөрүнүн спорттук мүмкүнчүлүктөрүн сынап, экологиялык маселелерге коомчулуктун көңүлүн бурууга салым кошушат.
