Эл аралык уюмдун адиси менен мамлекеттик аудитти өнүктүрүү талкууланды
Мамлекеттик кызмат жана жергиликтүү өз алдынча башкаруу иштери боюнча мамлекеттик агенттигинде Жогорку аудит органдарынын эл аралык уюмунун Өнүктүрүү демилгесинин (IDI) эксперти Бенжамин Фуэнтес Кастро менен жолугушуу өттү.
Жолугушууга Агенттиктин директорунун орун басарлары Руслан Кубаталиев жана Барчынай Садирова, башкармалыктардын жана түзүмдүк бөлүмдөрдүн жетекчилери менен адистери, ошондой эле Эсептөө палатасынын өкүлдөрү катышты.
Жолугушуунун жүрүшүндө мамлекеттик органдардын отчеттуулугун күчөтүү жана Эсептөө палатасы менен өз ара кызматташууну жакшыртуу маселелери талкууланды.
Тараптар мамлекеттик аудиттин натыйжалуулугун жогорулатуу, маалымат алмашуунун заманбап механизмдерин өнүктүрүү, санариптик чечимдерди киргизүү жана эл аралык стандарттарды колдонуу боюнча пикир алышты.
Мындан тышкары, мамлекеттик башкаруунун ачыктыгын жана тактыгын камсыз кылууда санариптик куралдардын ролуна көңүл бурулду.
Агенттик мамлекеттик башкаруунун сапатын, ачыктыгын жана натыйжалуулугун жогорулатууга багытталган эл аралык кызматташтыкты мындан ары да улантарын белгиледи.
