Кыргыз-кытай аймактар аралык кызматташтыгын кеңейтүү макулдашылды
Ош шаарынын мэри Жанарбек Акаев Кытайдын калаадагы Башкы консулу Лю Минчэни кабыл алып, кыргыз-кытай мамилелерин жана аймактар аралык кызматташтыкты өнүктүрүү маселелерин талкуулады.
Мэриянын басма сөз кызматынын маалыматына ылайык, жолугушууда соода-экономикалык, инвестициялык, транспорттук-логистикалык жана туристтик багыттардагы кызматташтыкты кеңейтүүгө өзгөчө көңүл бурулду.
Жанарбек Акаев кытайлык инвесторлордун Ош шаарына кызыгуусу өсүп жатканын белгилеп, бизнес-форумдарды, көргөзмөлөрдү жана эки тараптуу жолугушууларды өткөрүүнү сунуштады.
Ошол эле учурда мэр инвесторлор Кыргызстандын мыйзамдарын сактап, коомдук эрежелерди урматтоосу зарылдыгын белгиледи.
Жолугушуунун жыйынтыгында тараптар кыргыз-кытай аймактар аралык кызматташтыгын жаңы деңгээлге чыгаруу жана өз ара пайдалуу долбоорлорду ишке ашыруу боюнча макулдашышты.
Белгилей кетсек, Ош шаары Кытайдын Үрүмчү, Сиань, Синин, Шицзячжуан, Ланьчжоу, Фошань, Далянь жана Кашкар шаарлары менен байланыштарды түзгөн.
