Ош облусу менен Кытайдын жаңы кызматташтык багыттары талкууланды
Президенттин Ош облусундагы ыйгарым укуктуу өкүлү Аманкан Кенжебаев 13-августта Кытайдын Ош шаарындагы Башкы консулу Ли Минчэ менен жолугушту. Бул тууралуу аймактык өкүлчүлүктүн басма сөз кызматы билдирди.
Маалыматка ылайык, жолугушууда кыргыз-кытай достук мамилелерин жана аймактар аралык кызматташтыкты мындан ары бекемдөө боюнча пикир алмашуу болду.
Аманкан Кенжебаев Ли Минчэни жаңы кызматка дайындалышы менен куттуктап, Кытайдын Ош шаарындагы Башкы консулдугунун ишмердүүлүгүнүн кайра жанданышын жогору баалады.
Ыйгарым укуктуу өкүл соода-экономикалык, инвестициялык жана гуманитардык багыттардагы кызматташтыкты кеңейтүү үчүн мүмкүнчүлүктөр арбын экенин белгиледи.
Белгиленгендей, жыйынтыгында тараптар өз ара түшүнүшүүгө, ишенимге жана достук мамилелерге негизделген алаканы мындан ары да бекемдөөгө даяр экендигин билдиришти.
