Кыргызстан менен Кытай өткөрмө бекеттерди башкаруу боюнча келишим түзөт
14-августта Кыргызстан менен Кытай өткөрмө бекеттерди башкаруу жаатында кызматташуу жөнүндө долбоорду макулдашышты. Бул тууралуу Министрлер кабинетине караштуу Мамлекеттик бажы кызматынан билдиришти.
Маалыматка ылайык, талкууга Кыргызстандын Бажы жана Чек ара кызматтары, Тышкы иштер, Айыл чарба, Транспорт жана коммуникациялар, Саламаттык сактоо министрликтеринин өкүлдөрү катышты. Кытай тараптан тиешелүү мамлекеттик органдардын өкүлдөрү болду.
Документте өткөрмө бекеттерди башкаруу боюнча кыргыз-кытай комитетин жана айрым өткөрмө бекеттер боюнча жумушчу топторду түзүү каралган.
Бул эки өлкөнүн тиешелүү органдарынын ишин координациялоону күчөтүп, өткөрмө бекеттердин ишине байланышкан маселелерди ыкчам чечүүгө шарт түзөрү айтылды.
Макулдашууга кол коюу аземин Кытайдын төрагасы Си Цзиньпиндин Кыргызстанга Шанхай кызматташтык уюмунун саммитине катышуу үчүн келген учурунда өткөрүү мерчемделүүдө.
