Кыргыз-вьетнам мамилелерин чыңдоо багыттары талкууланды
Тышкы иштер министринин орун басары Медер Абакиров 17-августта Вьетнамдын Кыргызстандагы жаңы дайындалган атаайын жана ыйгарым укуктуу элчиси Нгуен Тхань Лени кабыл алды. Бул тууралуу ТИМдин басма сөз кызматы билдирди.
Маалыматка ылайык, Медер Абакиров элчини жаңы кызматка дайындалышы менен куттуктап, анын дипломатиялык ишмердүүлүгү кыргыз-вьетнам мамилелерин мындан ары чыңдоого жана өнүктүрүүгө өбөлгө түзөрүнө ишеним билдирди.
Нгуен Тхань Ле өз кезегинде өз ара пайдалуу кызматташтыкты өнүктүрүүгө жана биргелешкен демилгелерди ишке ашырууга көмөк көрсөтүүгө даяр экенин белгиледи.
Тараптар күн тартибиндеги орчундуу маселелерди, анын ичинде саясий жана соода-экономикалык кызматташтыкты, буга чейин жетишилген макулдашууларды ишке ашырууну жана мындан аркы өз ара аракеттенүүнүн келечектүү багыттарын талкуулашты.
Жолугушуунун соңунда тараптар кыргыз-вьетнам мамилелерин мындан ары чыңдоо максатында өз ара пайдалуу диалогду жана биргелешкен ишти улантууга даяр экендиктерин ырасташты.
