Ош шаардык кеңешинин депутаты кармалды
Ош шаарындагы “Жибек” балдар бакчасынын жетекчиси жумушка орноштуруу үчүн 25 миң сом пара алган деген шек менен кармалды. Бул тууралуу Ош ШИИБдин басма сөз кызматы билдирди.
Милициянын маалыматына ылайык, 17-августта 1988-жылы туулган шаар тургуну арыз менен кайрылган. Ал “Жибек” балдар бакчасына тарбиячы болуп жумушка кирүү үчүн мекеменин жетекчиси Ч.З. андан 25 миң сом талап кылганын билдирген.
Арыз ээсинин айтымында, акча берүүгө мүмкүнчүлүгү жок экенин айтып суранганына карабай, жетекчи башка талапкерлер бар экенин жана акча төлөгөндө гана жумушка келе аларын айткан.
Натыйжада ал алгач 20 миң сомду мобилдик банкинг аркылуу которуп, кийин айлык алгандан соң калган 5 миң сомду жетекчинин иш бөлмөсүндө бергенин билдирген.
Бул факт боюнча “Пара алуу” беренеси боюнча кылмыш иши козголду. Шектүү 17-августта кармалып, убактылуу кармоочу жайга киргизилди. Учурда тергөө амалдары уланууда.
Белгилей кетсек, шектүү катары кармалган жаран Ош шаардык кеңешинин депутаты.
