Татарстандын башчысы “Ала-Арча” жаратылыш паркына барды
Татарстан Республикасынын башчысы Рустам Минниханов иш сапары менен Кыргызстанга келди.
Жаратылыш ресурстары, экология жана техникалык көзөмөл министрлиги тарабынан "Ала-Арча" жаратылыш паркына сапар уюштурулуп, өлкөнүн уникалдуу жаратылышы жакындан тааныштырылды.
Сапардын жүрүшүндө Жаратылыш ресурстары, экология жана техникалык көзөмөл министри Акыл Токтобаев биологиялык ар түрдүүлүктү сактоо, жаратылыш экосистемаларын коргоо жана өзгөчө корголуучу жаратылыш аймактарын өнүктүрүү багытында жүргүзүлүп жаткан иштер тууралуу айтып берди.
Өзгөчө көңүл Кыргызстандын тоолуу экосистемаларынын маанисине бурулду. Алар өлкөнүн жаратылыш мурасынын маанилүү бөлүгү болуп саналат. Ошондой эле сейрек кездешүүчү жана жоголуп кетүү коркунучунда турган жаныбарлардын түрлөрүн сактоо маселелери талкууланды.
Сапардын уюштурулушу меймандарга расмий эмес шартта Кыргызстандын жаратылыш байлыгын көрсөтүүгө, ошондой эле айлана-чөйрөнү коргоо жана биологиялык ар түрдүүлүктү сактоо жаатындагы кызматташтыкты мындан ары өнүктүрүүнүн маанилүүлүгүн белгилөөгө мүмкүнчүлүк берди.
