Садыр Жапаров Владимир Путин менен жолукту
Президент Садыр Жапаров Кыргызстанга иш сапар менен келген Россия Федерациясынын президенти Владимир Путин менен сүйлөшүүлөрдү өткөрдү. Бул тууралуу президенттин расмий сайтына жарыяланды.
Тараптар кыргыз-орус кызматташтыгынын саясий, соода-экономикалык, энергетикалык жана гуманитардык тармактардагы актуалдуу маселелерди талкуулашты.
Жолугушуунун башында президент Садыр Жапаров кыргыз-орус мамилелеринин стратегиялык мүнөзүн жана эки өлкөнүн ортосундагы өз ара аракеттенүүнүн жогорку деңгээлин белгиледи.
“Биздин эки тараптуу мамилелерибиз бекем негизге жана стратегиялык мүнөзгө ээ. Россия Федерациясы менен жетишилген өз ара аракеттенүүнүн жогорку деңгээлине биз чоң маани беребиз жана мындан ары да практикалык кызматташтыкты бекемдөөгө жана кеңейтүүгө ниеттенип жатабыз”, – деди мамлекет башчысы.
Президент Садыр Жапаров Владимир Путинге Бишкек ШКУ саммитине катышкандыгы жана Кыргызстандын Уюмга төрагалык кылган мезгилиндеги артыкчылыктарын колдогондугу үчүн ыраазычылык билдирди.
Өз кезегинде Владимир Путин Кыргызстан ШКУ саммитин даярдоо жана өткөрүү боюнча чоң иштерди аткарганын айтып, өлкөнүн төрагалыгынын жыйынтыктарын баса белгиледи.
“Кыргызстандын төрагалыгы учурунда сиздин түздөн-түз катышууңуз менен Уюмду мындан ары өнүктүрүү жана бекемдөө боюнча маанилүү чечимдер макулдашылды. Саммиттин жыйынтыгы боюнча бир катар негизги документтер, анын ичинде Бишкек декларациясы жана ШКУ Хартиясына протокол кабыл алынды”, – деп белгиледи Россиянын президенти.
Жолугушуунун жүрүшүндө тараптар эки жактуу кызматташтыктын кеңири чөйрөдөгү маселелерин да талкуулап, соода-экономикалык, инвестициялык, энергетикалык, гуманитардык жана башка тармактардагы өз ара аракеттенүүнүн оң динамикасын белгилешти.
Аймактар аралык байланыштарды мындан ары өнүктүрүүгө, биргелешкен экономикалык долбоорлорду ишке ашырууга, ошондой эле билим берүү жана орус тилин колдоо жаатындагы кызматташтыкка өзгөчө көңүл бурулду.
Владимир Путин кыргыз-орус стратегиялык өнөктөштүк жана союздаштык мамилелери достук, өз ара сый-урмат жана бири-биринин кызыкчылыктарын эске алуу салттарынын негизинде ийгиликтүү өнүгүп жатканына токтолду.
"Биз Сиз менен эки тараптуу кызматташтыктын негизги маселелерин жеке көзөмөлүбүздө кармап, мындан ары да өз ара аракеттенүүнү ырааттуу өнүктүрүү ниетиндебиз", – деди Россиянын президенти.
Жолугушуунун соңунда президент Садыр Жапаров “Росатом” мамлекеттик корпорациясынын башкы директору Алексей Лихачевге кыргыз-орус кызматташтыгын өнүктүрүүгө кошкон олуттуу салымы үчүн Кыргызстандын мамлекеттик сыйлыгы – “Достук” орденин тапшырды.
