Кыргызстан менен Пакистан ишкерлер үчүн кызматташтык аянтчасын түздү
Бишкекте Кыргызстан менен Пакистандын Ишкерлер кеңешинин биринчи жыйыны өтүп, анда эки өлкөнүн ишкер чөйрөлөрүнүн ортосундагы кызматташтыкты кеңейтүү маселелери талкууланды.
Соода-өнөр жай палатасынын маалыматына ылайык, жыйында логистика, айыл чарба, адал индустрия, текстиль жана дары-дармек тармактарында биргелешкен долбоорлорду ишке ашыруу мүмкүнчүлүктөрү каралды.
Ошондой эле тараптар транспорттук байланыштарды жакшыртуу, бажы жол-жоболорун жөнөкөйлөтүү, бизнес-визаларды жеңилдетүү жана ишкерлердин түз байланышын өнүктүрүү боюнча пикир алышты.
Жыйындын соңунда Кыргызстан менен Пакистандын Ишкерлер кеңешин түзүү тууралуу келишимге кол коюлуп, эки өлкөнүн соода-экономикалык алакасын чыңдоого багытталган жаңы кызматташтык механизми ишке кирди.
