ЖКтин депутаттары Малайзиядагы парламенттик форумга катышышты
Жогорку Кеңештин депутаттары Эльвира Сурабалдиева жана Болотбек Борбиев Малайзиянын борбор калаасы Куала-Лумпурда өткөн Азия парламентарийлеринин калк жана өнүгүү боюнча форумунун (AFPPD) жылдык конференциясына катышты.
ЖКтин басма сөз кызматынын маалыматына ылайык, Эльвира Сурабалдиева AFPPDдин Аткаруу комитетинин 102-жыйынына катышып, Түштүк-Чыгыш жана Борбордук Азия өлкөлөрүнүн баяндамалары боюнча сессияга төрагалык кылды. Иш-чарада гендердик теңчилик, аялдардын мүмкүнчүлүктөрүн кеңейтүү, жаштарга инвестиция салуу, климаттын өзгөрүшү жана жигердүү узак жашоо маселелери талкууланды.
Ал эми Болотбек Борбиев “Жаштардын татыктуу иш менен камсыз болушу үчүн санариптештирүү: Кыргыз Республикасынын тажрыйбасы” аталышындагы баяндама менен чыгып, кесиптик көндүмдөрдү өнүктүрүү жана жаштардын иш менен камсыз болуу мүмкүнчүлүктөрүн кеңейтүү максатындагы санариптештирүүнүн мүмкүнчүлүктөрүн тааныштырды.
Мындан тышкары, Сурабалдиева Малайзия Сенатынын төрагасынын орун басары Нур Жазлан Мохамед менен жолугушту. Тараптар кыргыз-малайзиялык мамилелерди, парламенттер аралык кызматташтыкты кеңейтүүнү, бизнес, билим берүү жана академиялык байланыштарды өнүктүрүүнү талкуулашты.
