Аяз Баетов юстиция министри кызматынан бошотулуп, ордуна Алмаз Айылчиев м.а. болуп дайындалды
КРнын Президенти Садыр Жапаров кол койгон Жарлыкка ылайык, Кыргыз Республикасынын Конституциясынын 70-беренесинин 1-бөлүгүнүн 4-пунктуна, 71-беренесине ылайык юстиция министри Баетов Аяз Батыркулович башка ишке өткөндүгүнө байланыштуу ээлеген кызмат ордунан бошотулду.
Бул тууралуу Президенттик администрация жарыялады. Баетов Юстиция министрлигин 2021-жылдын 13-октябрынан бери жетектеп келген.
Эми анын ордуна - Президенттин Жарлыгына ылайык, Айылчиев Алмаз Асимович Кыргыз Республикасынын юстиция министринин милдетин аткаруучу болуп дайындалды. КРнын юстиция министринин кызмат ордуна дайындоо үчүн Айылчиев Алмаз Асимовичтин талапкерлиги Кыргыз Республикасынын Жогорку Кеңешине макулдашуу үчүн киргизилет.
Президент аны башка кызматка өткөнүнө байланыштуу Президенттик администрациянын Президенттин жана Министрлер кабинетинин укуктук камсыздоо бөлүмүнүн башчысынын орун басары – Укуктук камсыздоо бөлүмүнүн башчысы кызматынан бошотту.
Ал эми Айылчиев бошоткон кызматка Бакыт Нурудинов дайындалды. Ал Президенттик администрациянын Президенттин жана Министрлер кабинетинин укуктук камсыздоо бөлүмүнүн башчысынын орун басары – Укуктук камсыздоо бөлүмүнүн башчысы болуп дайындалды.
