Европа Биримдигинин Борбордук Азия боюнча атайын өкүлү Жогорку Кеңеште болду
Жогорку Кеңештин Эл аралык иштер, коргоо, коопсуздук жана миграция боюнча комитетинин төрайымы Эльвира Сурабалдиева Европа Биримдигинин Борбордук Азия боюнча атайын өкүлү Эдуардс Стипрайс менен жолугушту.
Бул тууралуу Жогорку Кеңештин басма сөз кызматынан кабарлашты. Билдирүүгө караганда, жолугушууда тараптар туруктуу өнүгүү, аймактык туруктуулукту камсыз кылуу, соода-экономикалык кызматташтыкты кеңейтүү жана саясий диалогду бекемдөө маселелери боюнча пикир алмашты.
Комитет төрайымы Эльвира Сурабалдиева өз ара кызыкчылык жараткан маселелерди ачык жана мазмундуу талкуулоо үчүн парламенттик диалогду пайдалануу чоң мааниге ээ экенин билдирип, муну менен катар Борбордук Азия өлкөлөрү үчүн өзгөчө актуалдуу болгон миграция жаатындагы маселелерге басым жасады.
Өз кезегинде Европа Биримдигинин Борбордук Азия боюнча атайын өкүлү Эдуардс Стипрайс КР менен ЕБ ортосундагы өз ара аракеттенүүнү мындан ары да бекемдөө зарылдыгын айтты.
Жыйынтыгында тараптар конструктивдүү өз ара аракеттенүүнү улантууга жана кыргыз-европалык кызматташтыктын маанилүү багыттарынын бири катары парламенттик дипломатияны өнүктүрүүгө кызыкдар экендиктерин билдиришти.
