РФдагы кыргыз жарандарынын төлөнбөй келген эмгек акылары төлөнүп берилди
КРнын Эмгек, социалдык камсыздоо жана миграция министрлигинин РФдагы Өкүлчүлүгүнө Кыргызстандын 10 жаранынан “УМК” ЖЧКсы тарабынан эмгек акынын төлөнбөй жаткандыгы боюнча жамааттык кайрылуу келип түшкөн. Бул боюнча Өкүлчүлүк тийиштүү иш жүргүзүп, түзүлгөн кырдаалды сотко чейинки тартипте жөнгө салуу боюнча иш берүүчү менен сүйлөшүүлөрдү өткөрдү.
Эмгек министрлигинин билдирүүсүнө караганда, жүргүзүлгөн сүйлөшүүлөрдүн жана жетишилген макулдашуулардын жыйынтыгында, 30-сентябрда кайрылган жарандарга эмгек акы боюнча карыз төлөнүп, анын жалпы суммасы 1 млн 872 миң рублди түздү.
Өкүлчүлүк Россия Федерациясында жүргөн КРнын жарандарынын эмгек укуктарын жана мыйзамдуу кызыкчылыктарын коргоо, ошондой эле эмгек талаш-тартыштарын колдонуудагы мыйзамдардын алкагында жөнгө салууга көмөк көрсөтүү боюнча иштерди улантууда.
