Садыр Жапаров Бакудагы саммитте чет элдик инвесторлорду “Тамчы” АФИАга чакырды
Президент Садыр Жапаров 15-октябрда Бакуда өткөн Азиядагы өз ара байланыштарды чыңдоо, санариптештирүү жана туруктуу экономикалык өсүшкө арналды кеңешменин (АӨИЧК) жетинчи саммитине катышып, Кыргызстандагы инвестициялык мүмкүнчүлүктөр тууралуу айтып берди. Бул тууралуу Президенттин басма сөз кызматынан кабарлашты.
Мамлекет башчысы өз сөзүндө акыркы төрт жылда Кыргызстандын АӨИЧКке катышкан өлкөлөр менен товар жүгүртүүсү эки эседен ашык өсүп, 2025-жылдын жыйынтыгында 14 млрд доллардан ашканын билдирди.
“Биз айрым инвестициялык долбоорлордон биргелешкен өндүрүштүк чынжырларды түзүүгө өтүүгө кызыкдарбыз. Мындай аянтчалардын бири катары ишкердик жана инвестициялык ишмердүүлүк үчүн өзгөчө укуктук режимге ээ “Тамчы” атайын финансылык-инвестициялык аймагын (АФИА) карап жатабыз. Өнөктөш мамлекеттерди бул аймактагы долбоорлорду ишке ашырууга катышууга чакырабыз”, - деди Мамлекет башчысы.
Ошондой эле ал Азия менен Европаны байланыштырган санариптик инфраструктураны өнүктүрүүнү сунуштады. Кыргызстанда кайра жаралуучу гидроэнергетикалык ресурстар жана жагымдуу климаттык шарттар бар экенин белгилеп, технологиялык компанияларды маалыматтарды иштетүү борборлорун түзүүгө чакырды.
Мындан тышкары, президент транспорттук-логистикалык байланыштарды кеңейтүү, энергетика жана туризм тармактарындагы кызматташтыкты өнүктүрүү маселелерине токтолду.
Камбоджа менен инвестициялык кызматташтык талкууланды
Саммиттин алкагында Садыр Жапаров Камбоджанын премьер-министри Хун Манет менен жолугушту.
Тараптар соода-экономикалык байланыштарды кеңейтүү, инвестиция тартуу, каржы-банк тармагындагы кызматташтык жана туризмди өнүктүрүү маселелерин талкуулашты.
Президент Камбоджанын ишкерлерин "Тамчы" АФИАдагы долбоорлорго катышууга чакырды. Ал эми Хун Манет өз кезегинде Кыргызстан менен соода, инвестиция жана туризм тармактарындагы кызматташтыкты кеңейтүүгө кызыкдар экенин билдирди.
Жолугушуунун жыйынтыгында тараптар эки өлкөнүн ортосундагы экономикалык жана инвестициялык кызматташтыкты мындан ары өнүктүрүүгө даяр экенин ырасташты.
