Президенттик шайлоо. МинКаб республикалык штабдын биринчи жыйынын өткөрдү
Министрлер кабинетинин төрагасы Адылбек Касымалиев президенттик шайлоону өткөрүү боюнча республикалык штабдын биринчи жыйынына катышты. Бул тууралуу мекеменин маалымат кызматы билдирди.
Маалым болгондой, отурумдун күн тартибине төрт маселе киргизилген. Ага Борбордук шайлоо комиссиясынын – президенттик шайлоого даярдыгы, шайлоочулардын тизмелерин тактоо жана шайлоо участокторунун даярдоо.
Тышкы иштер министрлигинин – чет өлкөлөрдөгү шайлоо участокторунун даярдыгы жана чет жакта жүргөн жарандардын шайлоо укуктарын ишке ашыруу.
Ички иштер министрлигинин – шайлоо өнөктүгүндө жана добуш берүү күнү коомдук тартипти жана коопсуздукту камсыз кылуу.
Президентинин Иш башкармалыгына караштуу “Кызмат” мамлекеттик мекемесинин өкүлдөрү – шайлоочуларды биометрикалык идентификациялоо, Face ID, манжа издери, техникалык жабдуулар, байланыш жана башка даярдыктар боюнча маалымат беришти.
Отурумдун соңунда министрлер кабинетинин төрагасы Адылбек Касымалиев алдыдагы президенттик шайлоону даярдоо жана өткөрүү боюнча негизги уюштуруу-практикалык иш-чаралардын календардык планын ишке ашырууга жооптуу бардык жетекчилерге тапшырмаларды дыкат жана өз убагында аткарууну тапшырды.
