Аймактарда толук күн иштей турган 9 бала бакча уюштуруу пландалууда
Кыргызстандын аймактарында толук күндүк режимде иштей турган тогуз бала бакча уюштуруу пландалууда. Учурда алар үчүн ылайыктуу жайларды тандоо маселеси каралып жатат. Бул тууралуу Агартуу министрлигинен кабарлашты.
Маалыматка ылайык, 20-октябрда министрликте ведомстволор аралык жумушчу топтун жыйыны өтүп, тогуз бала бакча үчүн жайларды тандоо жана мектепке чейинки билим берүү уюмдарындагы 128 топту эмерек менен камсыздоо маселелери талкууланды.
Жыйынга агартуу министринин, Саламаттык сактоо жана Өзгөчө кырдаалдар министрликтеринин, ошондой эле мектепке чейинки билим берүү тармагынын өкүлдөрү катышышты.
Адистер тандалуучу жайлардын коопсуздук талаптарына шайкештигин, балдар үчүн ыңгайлуулугун жана эмеректердин техникалык мүнөздөмөлөрүн карашты. Жыйынтыгында жайларды тандоо жана эмеректерге коюлган талаптарды тактоо боюнча кийинки кадамдар аныкталды.
Бул иштер Дүйнөлүк банктын “Келечек үчүн билим берүү” долбоорунун алкагында жүргүзүлүүдө. Долбоор балдардын мектепке чейинки билим алуу мүмкүнчүлүгүн кеңейтүүгө, коопсуз шарттарды түзүүгө жана аймактардагы бала бакчалардын материалдык-техникалык базасын жакшыртууга багытталган.
