Кыргызстан Түрк инвестициялык фондунун жыйынына катышты
Өзбекстандын Ташкент шаарында Түрк инвестициялык фондунун Башкаруучулар кеңешинин үчүнчү жыйыны өттү. Бул тууралуу бүгүн Экономика жана коммерция министрлигинен маалымдады.
Анда Фонддун ишмердигинин негизги багыттары, стратегиялык артыкчылыктары жана андан аркы институционалдык өнүгүүсү талкууланды.
Кыргыз Республикасынын атынан жыйынга экономика жана коммерция министри Бакыт Сыдыков Фонддун Башкаруучулар кеңешиндеги башкаруучу катары катышты.
Жыйында Фонддун ишмердиги, жетишилген натыйжалары жана өнүгүү келечеги, ошондой эле башкаруу жана мүчө мамлекеттердин ортосундагы өз ара аракеттенүү механизмдерин өркүндөтүү маселелери каралды.
Отурумда ТИФтин президентинин жана башкы директорунун кызмат орундарын ротациялоо механизмин өркүндөтүүгө өзгөчө көңүл бурулду.
Башкаруучулар кеңеши мүчө мамлекеттердин ортосунда жетекчилик кызмат орундарын ротациялоо графигин бекитти.
Ага ылайык, Кыргыз Республикасы 2026–2030-жылдарга Түрк инвестициялык фондунун президенттик кызматына талапкер көрсөтөт.
"Кыргызстан Түрк инвестициялык фондунун ишмердигине катышуусу мүчө мамлекеттердин ортосундагы финансылык жана инвестициялык кызматташтыкты өнүктүрүүгө, инвестицияларды тартуу мүмкүнчүлүктөрүн кеңейтүүгө, ошондой эле экономикалык өнүгүүгө жана аймактык өз ара байланыштарды чыңдоого өбөлгө түзгөн долбоорлорду колдоого багытталган", - деп билдирди мекемеден.
