Лебединовка ГЭСинин кубаттуулугу 10 МВтка чейин жогорулатылат
Лебединовка гидроэлектр станциясында реконструкциялоо иштери уланууда. Бул тууралуу "Чакан ГЭС" ААКсы билдирди.
Маалыматка ылайык, учурда станциядагы гидроагрегаттар, 6 кВ чыңалуудагы электр жабдуулары, күч трансформаторлору жана түтүк өткөргүчтөр демонтаждалды.
Алынган жабдуулардын айрымдарын башка чакан ГЭСтерде кайра пайдалануу пландалууда.
Реконструкциялоо иштери Европа реконструкциялоо жана өнүктүрүү банкынын кредиттик жана гранттык каражаттарынын эсебинен каржыланууда. Долбоорду Кытайдын China National Heavy Machinery Corporation компаниясы ишке ашырууда.
Долбоордун алкагында станциянын жабдуулары жаңыланып, кубаттуулугу 7,6 МВттан 10 МВтка чейин көбөйтүлөт. Бул ГЭСтин ишинин натыйжалуулугун жогорулатууга багытталган.
