Экономика министрлиги ишкерлерге жасалма документтерден сак болууну эскертти
Экономика жана коммерция министрлиги ишкерлерди продукциянын Евразия экономикалык бирлигинин талаптарына шайкештигин тастыктаган документтерди ортомчулар аркылуу тариздөөдө этият болууга чакырды.
Министрликтин маалыматына ылайык, SHANXI TZCO маркасындагы чынжырлуу экскаваторго берилген шайкештик декларациясынын катталганы ырасталган эмес.
Текшерүүдө документте QR-код жок экени, каттоо номери белгиленген форматка туура келбегени жана айрым маалыматтар туура эмес толтурулганы аныкталган.
Министрлик тиешелүү сыноолорду өткөрбөстөн же кошумча акыга тез арада документ даярдоо сунуштарынан сак болууга чакырды. Мындай документтерди колдонуу административдик жоопкерчиликке жана финансылык жоготууларга алып келиши мүмкүн.
Ишкерлерге аккредитацияланган органдарга түз кайрылуу жана документтердин аныктыгын ЕАЭБдин расмий реестрлеринен текшерүү сунушталды.
