Төрага Маматалиев Киотонун губернатору менен жолугушту
Жогорку Кеңештин төрагасы Марлен Маматалиев Жапонияга жасаган расмий сапарынын алкагында Киото префектурасынын губернатору Такатоси Нисиваки жана башка жетекчилер менен жолугушту.
Парламенттин басма сөз кызматы билдиргендей, жолугушууга депутаттар Талант Мамытов, Эльвира Сурабалдиева, Мирлан Жеенчороев, Жаныбек Аматов, Эрулан Кокулов, Бурул Аманова жана Максат Алымбеков да катышты.
Төрага Жапония Кыргызстан үчүн ишенимдүү өнөктөш экенин белгилеп, эки өлкөнүн ортосундагы кызматташтыкты мындан ары да бекемдөөнүн маанилүүлүгүнө токтолду.
"Киото Жапониянын бай тарыхын, маданиятын жана кылымдарды карыткан каада-салттарын сактап келген өзгөчө шаар. Андыктан эки өлкө ортосундагы достук мамилелерди аймактар аралык алакалар менен да бекемдешибиз кажет",– деди Марлен Маматалиев.
Ошондой эле төрага кийинки жылы Кыргызстан менен Жапониянын ортосундагы дипломатиялык мамилелердин түзүлгөндүгүнө 35 жыл толорун эске салып, бул дата эки тараптуу кызматташтыкты жаңы деңгээлге көтөрүүгө өбөлгө түзүшү керектигин кошумчалады.
Өз кезегинде Киото префектурасынын губернатору Такатоси Нисиваки да эки өлкөнүн ортосунда жогорку деңгээлдеги байланыштар жигердүү өнүгүп жатканын мисал кылып, Киото префектурасы Кыргызстан менен ар түрдүү багыттардагы кызматташтыкты жана тажрыйба алмашууну кеңейтүүгө кызыкдар экенин билдирди.
Мындан тышкары, расмий сапардын алкагында төрага баштаган кыргыз делегациясы Киото мамлекеттик резиденциясы жана Жапониянын белгилүү тарыхый-маданий эстеликтеринин бири болгон Киёмидзу-дера храм комплекси менен таанышты.
