Коомдук тамактануу тармагы бирдиктүү салыктын ставкасын 2%га чейин төмөндөтүүнү суранууда

Коомдук тамактануучу жайлардын өкүлдөрү бирдиктүү салыктын ставкасын 8%дан 2%га түшүрүүнү суранышууда. Бул тууралуу Economist.kg басылмасына Кыргызстандагы рестораторлор жана мейманканачылар Ассоциациясынын директору Евгений Тян билдирди.

Ал жаңы Салык кодекси күчүнө киргенин жана Салык кызматынын адистери рестораторлорго телефон чалып, 8%дык чен менен салык төлөөнү талап кылып жатышканын айтты.

Жакында коомдук тамактануу тармагынын өкүлдөрү Экономика министри менен жолугуп, ставканы 6%га түшүрүү маселесин талкуулашкан. Бирок рестораторлордун айтымында, бул сан дагы деле жогору болуп эсептелет.

«Мен кесиптештерим менен чатта жазышканда алардын көбү бул сумманы төлөй албай жатканын айтышты. Эгер ченди 6%га түшүргөндө деле бул ресторан тармагына терс таасирин тийгизет. Бишкекте мекемелер төлөм жөндөмдүүлүгүнөн улам кандайдыр бир жол менен салыктын бул ставкасын көтөрө алышат, бирок башка аймактар үчүн бул бизнести өлтүргөнгө барабар», – деди ал.

Тян коомдук тамактануу тармагы калкты жумуш менен камсыздоо боюнча лидерлердин бири болуп саналат жана ага расмий түрдө 200 миңден ашык адам тартылганын айтат.

«Биз салыктык ченди 2%га чейин төмөндөтүүгө аракет кылабыз, региондор үчүн ал 1%га чейин болушу мүмкүн. Алардын кирешесине караш керек. Мамлекеттик салык кызматы менен Экономика министрлиги ачык жана биз менен бул маселени талкуулап жатышат», – деди ал.

Ошондой эле Тян коомдук тамактануу ишканалары жана Экономика министрлиги бирдиктүү салыктын ставкасынын өлчөмү боюнча жумушчу топ түзүүнү пландап жатышканын кошумчалады.

«Ошондо гана бардык ресторандар көмүскөдөн чыгышат. Бизге да иштөөгө ыңгайлуу болот, мамлекет да каалаганын алат», – деп баса белгиледи Ассоциациянын жетекчиси.