«Альянс Алтын» компаниясы ИИМге 18 кызматтык унаа белек кылды
“Альянс Алтын” ААК компаниясы ИИМге Chevrolet Nexia үлгүсүндөгү унааларды тапшырды. Бул унааларды тапшыруу аземине аталган ишкананын директорлор кеңешинин төрагасы Ахмед Бажаев менен Ички иштер министри Улан Ниязбеков катышты.
Бажаевдин айтуусунда, компаниянын башкы максаттарынын бири катары өлкөнүн социалдык-экономикалык өнүгүүсү үчүн мамлекеттик органдарга жардам берүү болуп эсептелет.
“Бардыгыбыз, мамлекет дагы, калк дагы жана бизнес тармагы дагы Кыргызстанда ар дайым тынчтык жана тартип болуусуна кызыктар. Бул укук коргоо органдарынын материалдык-техникалык камсыздалуусунан дагы көз каранды”, – деди ал.
Жаңы унаалар ИИМдин кызматкерлеринин ыкчамдуулугун жогорулатып, кесиптик милдеттерин аткарууга жардам берет. Жаңы унаалардын көбү аймактардагы ички иштер органдарынын бөлүмдөрүнө бөлүнүп берилди. Жалал-Абадга – 4, Чүйгө – 4, Ысык-Көлгө – 9, ИИМдин нөөмөт бөлүгүнө – 1.
Белгилей кетсек, Жерүй кенин иштетип жаткан «Альянс Алтын» компаниясы август айына карата республикалык жана жергиликтүү бюджетке 7.6 млрд сом салык төлөсө, анын ичинен 4.9 млрд сому алтынды саткан каражаттан түшкөн.
