Инвестор: Кара-Балтадагы текстиль фабрикасынын курулушу жакында бүтөт - 400 миң доллар салынды
Кара-Балта шаарында текстиль фабрикасын куруп жаткан «Декна Бишкек Текстиль» ЖЧКнын директору, инвестор Фырат Дениз Улуттук инвестициялык агенттиктин директору Равшан Сабиров менен жолугушуусунда курулуш иштери дээрлик бүтүп калганын билдирди.
Белгилей кетсек, тигүү жана текстиль фабрикаларын куруу долбоору «Декна Бишкек Текстиль» компаниясы тарабынан ишке ашырылып жатат, инвестициянын көлөмү болжол менен 25 млн долларды түзөт. Ал эми курулушка 400 миң доллар сарпталган.
Түркиядан келген инвестор мурдагы Кара-Балта килем комбинатынын базасында жалпы аянты 53 миң чарчы метр жаңы текстиль фабрикасын ачууну пландаштырууда. Компания ишкананы кеңейтүүнү көздөп, совет мезгилинен калган аянты 35 миң чарчы метрди түзгөн оюнчук фабрикасынын имаратын кошо алган.
«Декна Бишкек Текстиль» ЖЧКсынын негиздөөчүсү жана ээси Фырат Дениз Сабировго текстиль фабрикасынын курулушу жакынкы аралыкта бүтөрүн билдирди.
Келечектеги ишкана кластердик ыкма менен иштеген уникалдуу фабрика болмокчу. Анткени ал даяр текстилдик кездемеден калган калдыктарды жипке жана кездемелерге кайра иштетүү аркылуу иш жүзүндө калдыксыз өндүрүштү камтыйт. Биринчи этапты ишке киргизгенден кийин ишкананын ишмердүүлүгүн кеңейтүү жана бүтүндөй текстиль кластерин түзүү пландаштырылууда.
Бул долбоорду ишке ашырууда 800-1000 жумушчу орун түзүлөт.
Кошумча окуңуз:
Түркиялык инвестор Кара-Балта шаарында жаңы текстиль фабрикасын ачат
