Израилдик «Биофармакс Групп» Кыргызстанда дары-дармек каражаттарын чыгарууну көздөөдө
Израилдик компания Кыргызстанда дары-дармек каражаттарын чыгарууну көздөөдө. Бул тууралуу кечээ, 14-сентябрда “Кыргызиндустрия” ААКтын кеңсесинде Израилдин «Биофармакс Групп» ЖЧК фармацевттик компаниясынын башкы директору Сарел Чен-Тов мырза менен коомдун президенти Жарасул Абдураимовдун жолугушуусу учурунда белгилүү болду.
Израилден келген делегациянын курамында акционерлердин инвестициялар боюнча кеңешчиси Туриски Игаль, эл аралык байланыштар боюнча кеңешчиси Руднев Владимир Игоревич, инновациялар жана өнүктүрүү боюнча директор Юли Израэль Хореш Себбаг болду.
“Кыргызиндустриянын” берген маалыматына караганда, алар КРнын аймагында дары каражаттарды биргелешип чыгарууну уюштуруу боюнча долбоорлорду ишке ашыруу багытында эки тараптуу кызматташууну талкуулашкан. Израиль делегациясынын башчысы Сарел Чен-Тов мырза «Биофармакс Групп» ЖЧК импорттолуучу фармацевттик каражаттардын өндүрүшүн баштоону көздөп жатканын жана компания Кыргызстанда жасалуучу препараттарды өндүрүүчүлөргө атаандаштык кылуу ниети жок экендигин билдирген.
Ошондой эле Израиль тарап иштеп жаткан ишканаларды модернизациялоого ар тараптан жардам көрсөтүүнү сунуш кылган жана тараптар бул долбоорду ишке ашыруу максатында конкреттүү кадамдарды жасоо үчүн жумушчу комиссия түзүү зарылдыгын белгилешип, өз ара кызматташуунун практикалык жактарын сүйлөшүшкөн.
