Министр менен бизнесмендин тиреши: Айыл чарба министрлиги «Тянь-Шань Форель» ЖЧКсында мыйзам бузууларды таап чыкты
8-августтан 10-августка чейин Айыл чарба министрлигинин Ветеринардык кызматы “Тянь-Шань Форель” ЖЧКсынын (Панфилов районунун Вознесеновка айылы) ветеринардык-санитардык талаптардын сакталышы боюнча текшерүү жүргүзүп, жыйынтыгында бир катар мыйзам бузууларды таап чыкканын билдирди.
“Текшерүүнүн жыйынтыгы боюнча ЕАЭБдин ветеринардык-санитардык ченемдерин жана талаптарын жана КРнын мыйзамдарын бузууларды четтетүү боюнча 3 (үч) мыйзам бузуулар аныкталды жана 15 күндүк мөөнөткө Жазма буйрук берилди.
Акваториянын участогун кароонун жыйынтыгы боюнча участоктун максатсыз пайдаланылышы, келишимдик милдеттенмелердин жана келишимдин предметинин аткарылбагандыгы аныкталды, бул жөнүндө кароо актысы түзүлдү. Иштин материалдары сот органдарына жөнөтүлдү”, – дейт министрлик.
Эскерте кетсек, буга чейин «Тянь-Шань Форель» балык чарбасынын директору ишкер Ильгиз Шаменов Айыл чарба министри Аскарбек Жаныбеков Фейсбуктан кайым айтышып келишкен.
Ага чейин ишкер Шаменов министр Жаныбековдун коркутуп-үркүтүүлөрүн, мыйзамсыз, себепсиз текшерүүлөрүн айтып, УКМКнын жетекчисине ачык кайрылуу жолдогон. Ага Шаменовдун Айыл чарба министрлигиндеги 1 млрд сомдук коррупциялык иштин бетин ачуу боюнча аракеттери себеп болгон.
Ошондой эле жакында эле Шаменов бийлик тараптан куугунтуктоо болгонун жана учурда ал Россияга кетип, балык чарба бизнесин ал жактан улантканы жатканын өзүнүн Фейсбук баракчасында билдирген эле.
