Марттан бери Кыргызстанга Россия, Беларусь жана КМШ өлкөлөрүнөн 50дөн ашык IT-компаниялар келишти
Кыргызстанга Россиянын IT тармагынан келгендер көп болууда. Бул тууралуу Жогорку технологиялар паркынын аткаруучу директору Чубак Темиров Economist.kg сайтына берген комментарийинде билдирди.
Анын айтымында, март айынан бери Жогорку технологиялар паркында Россия, Беларусь жана КМШ мамлекеттеринен 50дөн ашык компания жана жеке ишкерлер катталган.
«Кээ бирлери үй-бүлөсү менен, кээ бирлери кызматкерлери менен көчүп келишти. Агым абдан чоң. Бул Кыргызстанга оң таасирин тийгизет деп ойлойм, анткени алар чет өлкөдөн, АКШдан, Европадан жана башка өлкөлөрдөн акча таап, ошондой эле кызмат көрсөтүүлөрдү экспорттоп, экономикага акча салып, паркка 1%ын чегерип жана салык да төлөшөт», – дейт ал.
Мындан тышкары, Темиров бул экономиканын башка тармактарына да мультипликативдик таасирин тийгизерин баса белгиледи. Акылдуулардын келиши алардын билимин жана тажрыйбасын бөлүшүүгө, ишканаларды ачууга, жумуш орундарын түзүүгө шарт түзөт.
«Негизинен жогорку квалификациялуу адистер келишет. Кээ бир эл аралык компаниялар да келишүүдө, бул бизге абдан чоң тажрыйба. Алар биздин компаниялар менен биргелешип иштешип, биздин компанияларга экспортко чыгууга жардам бере алышат. Алар ички жана чет элдик рынок үчүн көптөгөн чечимдерди сунушташат.
Акылдуулардын жана квалификациялуу кадрлардын агымы Кыргызстандын IT тармагына чоң түрткү берет. Ал эми, мисалы, ЖТПны эле алсак, биздин саныбыз дээрлик 200 компанияга жакындап калды, 2022-жылдын биринчи жарымында биз өткөн жылдын ушул кварталына салыштырмалуу акча жүгүртүүнү эки эсеге көбөйттүк», — деди Чубак Темиров.
Россиялыктардын агылып келиши Кыргызстандын экономикасына кандай таасир этет?
