Новопокровкада балык тоюттарын чыгаруучу цех ачылды
Новопокровкада кечээ, 27-октябрда балык үчүн аква тоют даярдоочу цех ачылды. Жабдуулар БУУнун Азык-түлүк жана айыл чарба уюму (ФАО) тарабынан берилгенин аталган уюмдун маалымат кызматы билдирди.
Буга чейин дыйкандар сырттан келген кымбат тоюттарды же сапаты төмөн тоюттарды колдонууга аргасыз болуп келишкен. ФАО тоютту өндүрүү жана чарбаларда колдонуу жаатында заманбап технологияларды жана эл аралык мыкты тажрыйбаны киргизүү аркылуу КРдагы тоюттун сапатын жогорулатууда.
Цех негизги майдалоочу, экструдер, тоют кургатуу системасы, муздатуу системасы сыяктуу өндүрүштүк компоненттерди камтыйт. Заводдун өндүрүштүк кубаттуулугу – саатына 500 кг тоют чыгарат. Долбоордун жалпы бюджети: 337 миң доллар. Жабдууларды сатып алууга жумшалган инвестиция – 130 миң долларды түзгөн.
Тендер өткөрүлгөндөн кийин, мамлекеттик-жеке өнөктөштүктүн алкагында тоют цехин башкара турган жеке сектордон “Аква Сервис” компаниясы аныкталып, келишимге кол коюлган.
