Ошто көчөнү оңдоо үчүн үйлөрү бузулган тургундарга жаңы үй берилет
Ош шаарындагы Ош көчөсүндө үйлөрү бузулган бардык жарандар турак жай менен камсыздалат. Бул тууралуу шаардык мэриядан билдиришти.
Маалыматка ылайык, шаар мэри Жанарбек Акаев оңдоп-түзөө иштери жүрүп жаткан Ош көчөсүнө барып, турак жайлары бузулган тургундар менен жолугушту.
Калаа башчысы бир дагы жаран турак жайсыз калбай турганын айтып, бузулган үйлөрдүн ордуна Эне-Сай жаңы конушунан үйлөр берилерин билдирди. Жакынкы күндөрү тургундарга 20 үй тапшырылат. Калган турак жайлар Ош көчөсүнүн жашоочуларына этап-этабы менен берилет.
Белгилей кетсек, капиталдык оңдоонун алкагында Ош көчөсүнүн Ж. Раимбеков көчөсүнөн Т. Касымбеков көчөсүнө чейинки бөлүгү 4 тилкелүү болуп кеңейтилди. Жалпы узундугу 3 чакырымды түзгөн жолдун туурасы 24 метрге чейин жеткирилди.
Учурда көчөгө асфальт төшөө иштери жүрүүдө. Буга чейин жер астындагы инженердик түтүктөр алмаштырылып, ирригациялык лотоктор жана тротуарлардын бордюрлары орнотулган.
