Бишкек мэриясында 44 материал боюнча иликтөө жүрүүдө
Бишкек шаардык мэриясынын кызмат адамдарына жана түзүмдүк бөлүмдөрүнүн кызматкерлерине байланыштуу 44 материал боюнча иликтөө иштери жүргүзүлүүдө. Бул тууралуу борбор калаанын мэриясынан билдиришти.
Маалыматка ылайык, мэр Айбек Жунушалиевдин төрагалыгы алдында өткөн кеңешмеде муниципалдык кызматтардын ишинин сапаты, кызматкерлердин жоопкерчилиги жана мыйзам бузууларга бөгөт коюу маселелери талкууланды.
Кеңешмеде ишкерлердин бири муниципалдык администрациянын кызматкерине 5 миң сом которгону тууралуу маалымат да каралды. Мэр бул факт боюнча кызматтык иликтөө жүргүзүп, тиешеси бар адамдарды аныктоону тапшырды. Ошондой эле акча алган кызматкерди жумуштан бошотуу маселесин кароо милдеттендирилди.
Мындан тышкары, жыйында жолдорду жана тротуарларды оңдоо, коомдук транспорттун акыркы аялдамаларынын жана балдар аянтчаларынын абалы талкууланды.
Мэр шаар тургундарын муниципалдык кызматкерлердин ишиндеги мыйзам бузуулар боюнча так жана документ менен тастыкталган маалыматтарды берүүгө чакырды.
